A Consellaría de Innovación e Industria participará cun stand propio e diversas actividades de divulgación e promoción na Euroscience Open Forum Barcelona 2008 (ESOF 2008), que terá lugar en Barcelona do 18 ao 22 de xullo. A ESOF constitúe a maior reunión multidisciplinaria de científicos, promotores e xestores da investigación en Europa.

A ESOF2008 é una iniciativa de Euroscience, asociación científica que representa aos científicos europeos de todas as disciplinas vinculados ao sector público, universidades, organismos de investigación e empresas privadas. Euroscience opera como un grupo de debate e lobby político co obxectivo de crear un espazo de investigación europeo integrado. O público asistente, unhas 2.000 persoas, comprende científicos, responsables e xestores de política científica, empresarios, divulgadores científicos, xornalistas e público en xeral.

A Consellaría de Innovación e Industria estará presente nesta cita cun stand do Plan Galego de I+D+i 2006-2010 INCITE, no que terán especial protagonismo o seu Programa de Recursos Humanos e a estrutura do Sistema Galego de I+D+i. O obxectivo desta presenza é amosar aos investigadores e demais asistentes as oportunidades que ofrece Galicia para a I+D+i.

Ademais do stand, a Consellaría desenvolverá un programa de actividades complementarias durante a Feira. Deste xeito, o Grupo de Teatro Chévere representará o sabado 19, ás 14:30 h., e o domingo 20, ás 10:00 h. e ás 15:30 h., a obra de teatro científico “Alá no fondo hai sitio abondo: unha aproximación á nanotecnoloxía”. Para completar a axenda, o luns 21, ás 10:30, o director xeral de I+D+i, Salustiano Mato de la Iglesia, presentará INCITE na Esof, e en especial o Programa Imán, de captación de científicos de alto nivel para Galicia.